Bydd Jessica a Bethan yn perfformio gyda’i gilydd yn y perfformiad untro arbennig yma o ganeuon a ysbrydolwyd gan fywyd Morfydd Owen, ei cherddoriaeth a’r ffordd y mae’n dal i ysbrydoli cenedlaethau o artistiaid – yn neilltuol, artistiaid benywaidd, sy’n byw ym Mhontypridd a Threfforest a’r cyffiniau. Sgrifennwyd y cyfansoddiadau dwyieithog gan Bethan a Jessica ac fe’u cyllidwyd gan Tŷ Cerdd yn 2023. Roedd y fenter yn cynnwys gweithdy yn Parc Arts i artistiaid benywaidd lleol – ysbrydolodd eu geiriau hwythau hefyd ac maen nhw wedi’u cynnwys yn y cyfansoddiadau. Mae’r perfformiad yma’n arbennig dros ben gan mai yn Parc Arts y’i cynhelir – sef yr Eglwys Bresbyteraidd lle’r oedd Morfydd ei hun yn canu’r organ ac yn cyfansoddi yn ystod blynyddoedd bore’i hoes yn byw yn Nhrefforest.
Canwr a chyfansoddwr caneuon o Bontypridd yw Jess Morgan. Mae wedi canu ym mhobman o dafarnau a chlybiau lleol i eglwysi cadeiriol, adeiladau’r llywodraeth a neuaddau cyngerdd. Bu ar y radio a’r teledu ac mae’n frwd dros ymorol bod canu ar gael i bawb o bobol y byd fel sydd i’w weld arni’n arwain Côr Cymuned Pontypridd. Jess yw rheolwr Parc Arts ac mae’n canu’n rheolaidd gyda SOW Acapella.